Was fürn FESD!
Unsor Daach dor offnen Duhlbox amlässlisch des 10. Jubiläums gann voll un janz als Erfolg jewerded wern.
Abor eens nachm annorn:
Schon gurds nach Zehne am Samdaach gahmen die erschdn Besucher, wurdn von unsorn Midgliedorn in Empfang jenommen un dursch de Räume dor Duhlbox jeführt. Besonnersch de umfangreische Ausschdaddung dor Wergschdäddn wor vieln Besuchorn nich bewussd un wurde einjehnd beschdaund.
Dem Moddo „ Liebor Massnvornischdungswaffln als Massnvornischdungswaffen“ foljend begann unsre fleißschn Waffelbäggor um gurz nach Elfe mid dor Brodugschon und fandn in den Besuchorn dangbahre Abnehmor, die dann jud jestärgd in den Vordraachsblogg schdardn gonndn.
Un der hadde es in sisch: Den Offdaggd machde BusyBeaver mid seim Dehma „Ohgmended Realidäd“ jefolchd von Zehas Bubligumsmagnedn „So fungschonierd ä Sündeseisor“ un „Schbiehleendwigglung in dor Duhlbox“. Hungrisch jewordn gonndn sisch de Jäste nun am bereids anjefeuordn Grill schdärgn, den Kiko und msmr mit nem Hoofen Leggorreien beschdüggdn und jedn offgommenden Hungor in Schach hieldn. Dsum Nachdisch loggdn dann widdor Waffln und n reischhaldisches Guchnbühfeh.
Ä weidores Heileid im Brohgramm war xythobuz Drohnenfluchschoh, der undor den bejeisdordn Oochn von Jung un Ald seine Drohnen zu Höschdleisdungnen anschbohrnde. Bassnd dadsu hield Alex sein "Quadrogobdor Grundgurs", bevor de Vordraahchsreihe mid "Gondänor - Ä Übborbligg übbor de Gondänor-Deschnologie" abschloss.
Doch man mussde nisch von Heileid zu Heileid jachdorn, denn unsre Launsch lud ebenfalls zum Vorweihlen ein. Besonnorsch de Kinnor nudsdn jede Möchlischgeid und ruhdn sisch of ihre Ard im Bällebad aus. Wem das dann doch zu langweilisch war, der gonnde jansdägisch am heißgejehrdn Kinnor-Löd-Wörgschob deilnehm.
Fasd Pflischd für unsore jungn Jäsde war ä Besuch innor Bibliodehch um dorde eens dor vieln Redrogähmes auszubrohbiern. Die Reschnor dorde liefn buchschdäblisch heiß... Nimm das, Fordneid!
Jegen Sechse vorliehsn dann ooch de ledsdn dor insjesamd edwa zweehunnordfuffdsch Besucher beseeld de Räume dor Duhlbox und mansch eenor wussde: "Heudde war nisch das ledsde Ma..."
